پاکستانی نوجوان نے سعودی عرب میں ایسا کیا کام کیا جس پر اسے ہر طرف سے شاباش ملنے لگی

سعودی عرب میں تقریباً پچیس لاکھ پاکستانی کام کاج کر رہے ہیں جو سالانہ اربوں روپے کا زرمبادلہ پاکستان بھیج کر پاکستان کی معیشت کو مضبوط کر رہے ہیں تو دوسری طرف سعودی کی ترقی و خوشحالی میں بھی اپنا بھرپور کردار ادا کر رہے ہیں
کبھی کبھار چند ایک پاکستانیوں کی طرف سے  قانون کے خلاف حرکات سامنے آتی ہیں، تاہم مجموعی طور پر پاکستانی تارکین وطن سعودی قوانین کی مکمل پاس داری کرتے نظر آتے ہیں۔
ایک ایسے ہی ذمے دار پاکستانی نے قانون کا ساتھ دے کر لاکھوں سعودیوں کے دل جیت لیے ہیں۔ سعودی ویب سائٹ المرصد نے خبر شائع کی ہے جس میں بتایا ہے ریاض میں مقیم ایک پاکستانی نوجوان نے میونسپلٹی سے رابطہ کر کے انہیں دو حجاموں کے بارے میں اطلاع دی جو کورونا سے متعلق حکومتی احکامات کی خلاف ورزی کر کے اُن کی حجامت اور شیو بناتے تھے۔
ان حجاموں نے اپنی رہائش گاہ میں ہی غیر قانونی طور پر حجامت کا اڈہ قائم کر رکھا تھا

میونسپلٹی نے پاکستانی نوجوان کی مخبری کے بعد پولیس کے ساتھ مل کر ان دو غیر ملکی حجاموں کو رنگے ہاتھوں گرفتار کرنے کا منصوبہ بنایا۔ ایک اہلکار نے ان حجاموں سے فون پر رابطہ کر کے اپنی اور ساتھیوں کی شیو بنوانے کی خواہش ظاہر کی۔ دونوں حجاموں نے اسے اپنے ٹھکانے پر بُلایا۔ اسی دوران طے شدہ منصوبے کے تحت میونسپلٹی اور پولیس کے اہلکاروں نے چھاپہ مار کر دونوں حجاموں کو گرفتار کر لیا۔
ایک مقامی صحافی نے اس ساری واقعے کی ویڈیو بھی بنائی۔ جس میں دیکھا گیا ہے کہ ان حجاموں کی رہائش گاہ کتنی خراب حالت میں تھی اور صفائی ستھرائی کا بھی کوئی انتظام نہ تھا۔ اس واقعے کے بعد سوشل میڈیا پر میونسپلٹی کو اطلاع دینے والے پاکستانی کی خوب تعریف کی جا رہی ہے ، جس سے تمام پاکستانی کمیونٹی کا سر فخر سے بلند ہو گیا ہے۔
نوائے صداقت